17 -Nov ~ 5 Dec

呢兩個禮拜好充實。最主要都係走去食同玩。先同Jess，Crystal 大榮華試菜，再來 Charles 辭職成班同事去大榮華食到反肚。MT的妹妹來香港玩完我地又去唱K。同叉叉前後又唱左兩次K，行左一次山。跟承恩去玩識左班新朋友，去玩奧比斯的行夜山，上深圳食全羊宴，無喇喇去西貢行山睇日出…

仲有學車呢~~

1-Sep ~ 9-Sep
台灣公幹之旅，今次係鄉下地方桃園。
先入住上次公幹住過的深坑假日飯店，都係鄉下地方，但起碼出去台北市20分鐘車程都算近。
每朝早專車接送行高速，入桃園做野要成個半鐘。每日坐車就唔見左3個鐘。

由於安排禮拜日有工作，day off轉做禮拜五六。就去左行動物園，坐貓空覽車。木柵動物園真係好近深坑，酒店對面坐NT15巴士，三四個站就到。睇到好多動物，大象老虎班馬猿猴河馬好多好多好多，咁大個仔第一次去動物園。我唔記得有無去過荔園，就算有我都太細個應該無記憶。但因為花太多時間響昆蟲館同夜行動物館，結果去唔到極帶區睇企鵝同北極狐。臨走前響草園區見到駖羊同班馬，獅子同長頸鹿就已經收左工。唔，最大收穫係夸過圍欄餵左一隻駝馬食草，仲摸到佢個頭添。6點休館但好多人都行到6點半。出來行過隔離就係貓空覽車。見佢收10點就坐下喇。來回車費NT100，即係HKD25，好平。其實上到去係無野玩既，餐廳買的野又唔o岩食。買完手信，行個圈，蓋個郵戳就坐返落去。最好的就係車程之中可以見到燈火燦爛的台北夜景，但由於只係借左部卡片式DC，又遠又暗覽車又郁係影唔到既。

禮拜日，台灣的vendor帶左我去陽明山。車程順道先去鶯歌陶瓷老街，行左一圈食下零食，睇中件燒得好靚的茶杯同碟，但坐飛機費事買呢d易碎品就無買。最後落腳點係陽明山上面一處露天西餐廳，有人現場演奏色士風添。食完休息一陣就去泡北投溫泉。白雪雪好似牛奶咁，反覆泡溫泉同凍水池，睇下天空的星星，咁又過左半個鐘。

12-Sep
放工同同事去石澳BBQ，雖然唔係中秋正日，賞下月食月餅都幾好氣氛。
玩Game班女仔贏哂，三娘教子局，男仔輸都正常。都係鍾意佢先玩佢o者。猛咁飲好彩唔係我。

13-Sep
今日去左貴記問學電單車的事，大概用三四個月，五千蚊度，下次同埋承恩出去就OK。

中秋連週末，總共放三日假。